Ghazal Shayari – BarsoN ke Baad Dekha Ek Shakhs Dilruba Sa – by ahmad faraz

BarsoN ke Baad Dekha Ek Shakhs Dilruba Sa

Barson ke baad dekha, ik shaks dil-ruba sa
Ab zehen mein nahi hai, par naam tha bhalaa sa

Abaroo khinchey khinchey sey, aankhein jhuki jhuki si
Baatein ruki ruki si, lehjaa thaka thaka sa

Alfaaz thay k jugnoo, awaaz ke safar mein
Ban jaaey jangalon mein, jis tarah raasta sa

Khwaabon mein khwaab us ke, yaadon mein yaad us ki
Neendon mein ghul gaya ho, jaisey ke rat-jagaa sa

Pehley bhi log aaey, kitne hi zindagi mein
Wo har tarah se lekin, auron se tha judaa sa

Agli mohabbaaton ne, wo naa-muraadiyaan deen
Taaza rafaaqaton se, dil tha dara dara sea

Kuch ye k muddaton se, ham bhi nahi thay roey
Kuch zeher mein bujhaa tha, ahbaab ka dilaasa

Phir yun hua ke saawan aankhon mein aa basey thay
Phir yun hua ke jesey, dil bhi tha aabalaa sa

Ab sach kahein tou yaaro, hum ko khabar nahi thi
Ban jaaega qayaamat, ik waaqeya zara sa

Taiwar thay bey-rukhi ke, andaaz dosti ke
Wo anabi tha lekin, lagta tha aashna sa

Hum dasht thay k dariyaa, hum zeher thay k amreet
Naa-haq tha zonam ham ko, jab wo nahi tha piyaasa

Hum ne bhi us ko dekha, kal shaam ittefaaqan
Apna bhi haal hai ab, logo Faraz ka sa

About admin

Check Also

Gham e Hayat ka Jhagra by Ahmad Faraz

Gham e Hayat ka Jhagra by Ahmad Faraz Gum e Hieyat Ka Jhagra Meta Raha …

Leave a Reply

Your email address will not be published. Required fields are marked *